З 18 па 23 лютага ў Юрацішкаўскім яслях-садзе – сярэдняй школе праходзіў Тыдзень беларускай мовы і літаратуры.
Мэта мерапрыемстваў прадметнага тыдня – папулярызацыя роднай мовы сярод вучняў, настаўнікаў, бацькоў, развіццё пазнавальнай і творчай актыўнасці, выяўленне і заахвочванне найбольш адораных вучняў.
У прадметным тыдні прынялі ўдзел настаўнікі пачатковых класаў, настаўнікі роднай мовы і літаратуры, вучні 1-11 класаў.
Тэма першага дня - “Роднаму слову прызнанне ў каханні”. У гэты дзень прайшла акцыя “Любімае роднае слова”, падчас якой гучалі самыя прыемныя і пяшчотныя словы на роднай мове. Самымі любімымі словам сярод удзельнікаў акцыі сталі словы шчасце, кветка, прыгажосць. Таксама ў гэты дзень гучалі выказванні пра мову на тэму “Жывая крыніца”. Выстава ў ІБЦ “Беларускія кнігі-юбіляры 2019 года” чакала ўсіх, хто цікавіцца беларускім мастацкім словам.
Тэма другога дня – “Хараство роднага слова”. Вучні пачатковых класаў разам са сваімі настаўнікамі рэкламавалі ветлівыя словы і тым самым замацоўвалі навыкі этычных паводзін. У конкурсе чытальнікаў вершаў паэтаў-землякоў гучалі вершы Яўгена Карпуця, выпускніка школы. Сацыялагічнае міні-даследаванне “Самае лепшае – беларускае” паказала, што любімымі беларускімі аўтарамі сярод бацькоў з’яўляюцца класікі беларускай літаратуры Янка Купала і Якуб Колас, сярод настаўнікаў – Максім Багдановіч і Уладзімір Караткевіч. Любімая беларуская кніга – “Чалавек ідзе” Янкі Маўра, “Людзі на балоце” Івана Мележа, “Ніколі не забудзем”,. Сярод вучняў любімы беларускі спявак – Макс Корж, сярод дарослых – ансамбль “Песняры”. Любімая беларуская песня ўсіх апытаных– “Касіў Ясь канюшыну”, любімы фільм – “Белыя росы”, любімая гульня – хованкі. У конкурсе сачыненняў, “Балючая памяць”, прысвечаных 30-годдзю вываду войск з Афганістана, стала Багушэвіч Сафія.
У трэці дзень, тэма якога “Гонар і слава герояў”, гераічнымі і мужнымі словамі беларускай мовы гаварылі пра подзвігі і славу воінаў-інтэрнацыяналістаў пад час адкрытагадыялога “Афганскі боль”. Гучалі вершы беларускіх паэтаў і песні беларускіх кампазітараў, прысвечаныя падзеям і героям афганскай вайны. Вучні 1-2 класа стваралі ілюстрацыі да беларускіх народных казак. Вучні 3-4 класаў наведалі школьны музей, які ў дадзеным навучальным годзе абнавіў краязнаўчую залу.
Чацвёрты дзень “Свята роднай мовы”, прысвечаны Дню роднай мовы. Вучні 1 і 2 класа даведаліся аб тым, чаму менавіта ў гэты дзень адзначаецца дадзенае свята. 25 вучняў 3-9 класа прынялі удзел у гульні-конкурсе “Буслік”.
Тэма пятага дня “Жыву ў Беларусі і тым ганаруся”. У гэты дзень вучні 1-2 класа ўдзельнічалі ў конкурсе малюнкаў “Родныя вобразы”, вучні 3-4 класаў – у конкурсе чытальнікаў вершаў на роднай мове. Вучні 10-11 класаў праходзілі QR-квэст "Загадкі малой радзімы", дзе прадэманстравалі свае веды пра гісторыю і культуру сваёй малой радзімы.
Шосты дзень быў прысвечаны закрыццю Тыдня беларускай мовы і літаратуры і падвядзенню вынікаў. Была праведзена акцыя “Пажаданні роднай мове” і выстава-прысвячэнне “Люблю свой родны пасёлак”, у якіх прынялі удзел усе настаўнікі і вучні.
На працягу тыдня вучні 5-11 класаў праз блог настаўніка беларускай мовы і літаратуры Сілюк Н.У. прымалі ўдзел у акцыі “Мова родная – мова модная!” і дэманстравалі свае веды па беларускай мове і літаратуры. Самыя актыўныя ўдзельнікі акцыі атрымалі сертыфікат на 10 балаў
Як бачым, на працягу Тыдня беларускай мовы і літаратуры ў вучняў 1-11 класаў была магчымасць актуалізаваць веды па беларускай мове і літаратуры, паказаць узровень эрудыцыі, задаволіць сваю цікаўнасць, пашырыць кругагляд, захапіцца прыгажосцю беларускага мастацкага слова.
